Дар маркази шаҳри Хуҷанд Хонаи саводи иттилоотиву расонаӣ (СИР) кушода шуд. Акнун дар он ҷо барномаҳои таълимӣ оид ба саводи рақамиву расонаӣ барои мактаббачагон, донишҷӯён ва ҳатто калонсолон баргузор карда мешаванд. Масалан, моҳи майи соли равон, ҷашнвораи онлайн баргузор мешавад, ки хоҳишмандон метавонанд дар мастер-классҳои мавзуъӣ, бозиҳо, озмунҳо ва квестҳо ширкат варзанд. Ҳамзамон шурӯъ аз ҳафтаи оянда, дар Хонаи СИР дарсҳои саводнокии расонаӣ бо забони англисӣ оғоз мегарданд.
Қариб 30 кас дар маросими ифтитоҳии Хонаи СИР дар Хуҷанд, ки рӯзи душанбе, 26 уми апрел баргузор шуд, бо ҳам ҷамъ омаданд. Ташкилкунанда ва куратори ин лоиҳа, омӯзгори Донишгоҳи давлатии Хуҷанд Гулорохон Тӯраева хеле хушҳол аст, ки дар маросими ифтитоҳии Хона ҳамкасбонаш аз донишгоҳҳои вилояти Суғд ҳузур доштанд. Вай умедвор аст, ки мураббиён саводнокии расонаиву рақамиро ба донишҷӯён меомӯзонанд. Дар донишгоҳҳои Тоҷикистон то ҳол дар ин самт фанни алоҳида вуҷуд надорад.
– Сатҳи саводнокии расонаӣ миёни ҷавонони вилояти Суғд дар сатҳи хуб нест. Ман ҳам донишҷӯёни худ ва ҳам аз ҷавонони курсҳои саводнокии расонаиро мушоҳида карда, баҳо медиҳам. Вале агар донишҷӯён хуб таҳсил кунанд, пас сатҳи саводнокии расонаиву рақамиашон баланд аст, зеро тафаккури интиқодӣ ташаккул меёбад, мегӯяд Гулорохон.
Худи Гулорохон аз соли 2016 ба ин мавзӯъ таваҷҷӯҳ зоҳир кард. Пас аз чор сол, дар чорабинии саводнокии расонаиву рақамии Эдютон – 2020, ки дар шаҳри Алмаато баргузор шуд, дар ҳамроҳии ҳамкасбонаш Зебуниссо Муродова аз Хатлон ва Афсона Мамадаёзова аз ВМКБ лоиҳае таҳия карданд.
Лоиҳаи онҳо барои татбиқ маблағгузорӣ ба даст овард. Лоиҳа (дарсҳо барои донишҷӯёни минтақаҳои дурдасти ҷумҳурӣ) бомуваффақият амалӣ гашт ва Гулорохон тасмим гирифт, ки корро дар ин самт идома диҳад.
Интернюс дар охири сол, озмуни ҷустуҷӯйи шариконро барои гузаронидани ҷашнвораҳои саводнокии расонаии онлайнӣ эълон кард. Гулорохон ба ин озмун лоиҳа пешниҳод карда, боз ҳам дар қатори беҳтаринҳо қарор гирифт. Якҷоя бо ҷашнвораи онлайнӣ тасмим гирифта шуд, ки дар заминаи он Хонаи СИР ҳам кушода шавад. Ҳамакнун дар ин Хона натанҳо Гулорохон, балки дигар омӯзгорон, рӯзноманигорон ва фаъолони ҷомеаи шаҳрвандӣ низ лоиҳаҳои худро амалӣ хоҳанд кард.
– Мо аз Хонаи СИР ҷашнвораи онлайнро оид ба саводнокии расонаиву рақамӣ мегузаронем. Мо мехоҳем, ки иштирокчиёнро аз тамоми вилояти Суғд ва аз шаҳри Душанбе ҷалб кунем. Ин як ҷашнвораи серӯза хоҳад буд, ки моҳи май баргузор мешавад. Вале ман рӯзҳои дақиқи ҷаласаро ҳоло гуфта наметавонам. Аммо мо ҳатман дар бораи он дар шабакаҳои иҷтимоӣ маълумот хоҳем дод, – мегӯяд Гулорохон.
Илова бар ҷаласа, 3 юми май дар Хонаи СИР курсҳои омӯзиши саводнокии расонаиву рақамӣ бо забони англисӣ оғоз мешаванд. Дарсҳо то моҳи июл идома хоҳанд ёфт ва Гулорохон мегӯяд, ки хоҳишмандони ширкат дар он назар ба нақшаи пешбинишуда хеле зиёданд.
– Мо 15 касро дар нақша доштем. Вале аллакай 25 нафар дархост фиристодаанд. Мо иштирокчиёни сатҳи Pre-Intermediate доштаро даъват мекунем. Дар ҷараёни дарсҳо, онҳо метавонанд на танҳо дар бораи саводнокии расонаӣ маълумот пайдо кунанд, балки малакаҳои забони англисии худро такмил диҳанд, мегӯяд Гулорохон.
Ин дарсҳо ба тариқи интерактивӣ гузаронида мешаванд. Дар ҳар як модул (дар маҷмуъ 5 то мавҷуд аст) барои ин видео, викторинаҳо, бозиҳо мавҷуданд. Дар натиҷаи омӯзиш, донишҷӯён бояд дар мавзӯъи саводнокии расонаиву рақамӣ муҳтаво эҷод кунанд. Пас аз он, иштирокчиён шаҳодатнома мегиранд.
– Маро ҳамчун омӯзгор сатҳи пасти дониши забони англисӣ дар Тоҷикистон ташвиш медиҳад. На танҳо дар Тоҷикистон, балки дар Осиёи Марказӣ дар муқоиса бо дигар минтақаҳо сатҳи забони англисӣ хеле паст аст. Ҳамзамон сатҳи саводнокии расонаӣ низ. Аз ин рӯ, мо тасмим гирифтем, ки ин ду самтро якҷоя карда, якбора донишҷӯёнро дар ин ду самт рушд диҳем. Ба дарсҳо шавқу маром зоҳир мегардад. Мо умедворем, ки минбаъд низ дар ин формат кор хоҳем кард, – мегӯяд Гулорохон.
Омӯзгор ният дорад, ки тамоми барномаҳоро дар фазои озод роҳандозӣ кунад, то донишҷӯён худро роҳат ҳис кунанд. Гулорохон мегӯяд, ки дар ҷаҳони имрӯза бидуни саводнокии расонаӣ ва малакаи донистани забони англисӣ ба даст овардани муваффақият барои одамон хеле мушкил аст. Ӯ омода аст, ки барои шогирдонаш тамоми шароитҳоро фароҳам оварад, то онҳо донишҳои заруриро аз худ кунанд.
Барномаи осиёимарказии MediaCAMP аз ҷониби USAID маблағгузорӣ шуда, Internews онро амалӣ мегардонад. Маълумоти бештари барномаро метавонед аз инҷо пайдо кунед. Муфассал оид ба созмон: Internews дар ҷаҳон, Internews дар Тоҷикистон.